Besnik Jaha

Recensioni-Shqyrtesa Besnik Jaha

Recensioni/shqyrtesa është shkrimi i një teksti për një tekst, duke e analizuar në formë kritike, gjithmonë pas një leximi shumë të kujdesshëm e analitik të tekstit. Në analogji me kritikën gjenetike, teksti të cilit i bëhet recensioni del të jetë amza e tekstit të njohur me emrin recension. Recensioni si formë shkrimi vjen bukur vonë, diku nga fundi i shekullit XVIII. Kjo është koha kur shtypi periodik merr një zhvillim të hovshëm, dhe recensioni si shkrim, qoftë letrar, kritik e publicistik është i pranishëm nëpër lajmëtore. Që në fillim të daljes së tij nëpër lajmëtore recensioni e mori vendin e vet. Shpejt ai zuri rubrikën e zakonshme e të rregullt në publikimet periodike, kurse më vonë lajmëtoret dhe revistat nisën të mbajnë recensentë të rregullt. Sot recensioni është një shkrim sa letrar aq edhe gazetaresk, sa informativ aq edhe shkencor. Vendi i tij në gazetë nuk është i vetmi vend i prezantimit të tij. Pavarësisht kësaj, pra vendit në lajmëtore, përveç faktit se sot ai shkruhet në dy modele: herë si formë që paralajmëron veprën që do të botohet; herë si formë që vlerëson veprën e botuar, recensioni nuk ka ndërruar në asgjë më tepër, qoftë në aspektin esencial apo formal.